بيكيـــــــــــــــــــــــــا

عربيه خشب
ساحبه راجل عجوز
وخارجه بيه فى عز البرد
وهوبينادى الصبح بصوت ضعيف
" بيكيـــــا"
عربيه خشب
تعبت م اللف فى الشوارع والحارات
وشيل العفش القديم
اللى عليه ريحة اصحابه وذكرياتهم

عربيه خشب
مركونه جنب الرصيف
وصاحبها العجوز بيحط عليها
السرير القديم
اللى شاف اول لحظة حب
مابين اتنين
نايمين دلوقتى ف هدوء
تحت المطر والصمت والصبار

لوحة ناقصه

رسمت شارع
وميدان واسع
ورصيف طويل
مشيت عليه بنات حلوين جداً
وقعدت على القهوه اعاكس فيهم
لحد ماواحده منهم ابتسمت لى
نسيت احاسب الجرسون
وفضلت ماشى
ماشى
ماشى
لحد ما خلصت الصفحه

نهار مسحور

ليه بسمة البنت الجميله
الصبح
ربكتنى ؟؟
خلتنى أبدأ نهار
ماهوش معقول


انا اللى سرحت روحى
مع ريحة البن اللى جايه م الماضى
ازاى راح اوصف ؟
طعم الصباح الدافى
فى نص يناير البردان
وشمس
فردت ضيها على الحيطان
وع الكفوف الرقيقه لزحمة التلاميذ
يتهز غصن الروح
من ريحة الياسمين
على ناصية الشارع
وصوت خطوة البنت ع الاسفلت
خلانى لـيه انشـغلــت
بلحن لغنوه منسيه
خلانى افرد خطــوتى
وابدأ نهار مسـحور
بـهديل طـيور الـروح
على حافة الشبابيـك

كإنه غمضة عين

ساعات افتكر حاجه عدت فى حياتى وافتكر فى الاول ان الحاجه دى حصلت من وقت قريب وشويه افتكر ان الحاجه دى حصلت مثلاً فى تانيه ثانوى أو تالته ثانوى حسب طريقتى الخاصه فى تأريخ حياتى ولما افتكر أقول لنفسى أه يعنى سنة 89 يعنى من عشرين سنه

كده ببساطه ؟

عمرى اللى عدى كإنه غمضة عين

عمرى اللى عدى

أجيبه تانى منين ؟

بتخلص الحواديت

كإنى بانزل سلالم

وبارد باب البيت

تحت شباك الحنين

اليها تحت اى سماء كانت

من هنا عدى الولد

من هنا عدى الحنين

من هنا عدى الشجن

الضرفتين مش مفتوحين

متعفرين ليه بالتراب

البنت راحت بس فين

دى لسه كانت من يومين

دى لسه كانت من سنه

دى لسه كانت من سنين

بنوته تشبه للقمر

بنوته تشبه للصباح

تفتح ضلام الشباكين

تطلق عصافير الغنا

وانا كنت فايت من هنا

دلوقت انا فايت حزين

وانتى هناك ماعرفش فين

انا وانتى كنا فى دنيا واحده

خلاص بقينا فى دنيتين

جنة الحواديت

ماتدخلينى جنة الحواديت
وترجعينى طفل من تانى
فرحان بمنظر لمة الكتاكيت
على السطوح
والشمس فى يناير
والراديو داير ع الاغانى
وصوت
عبد الحليم طالع من المنور
ماتغرقينى فى دنيتك اكتر
جوه عبير العطر من صوتك
حتى سكوتك
يشبه الاحلام
باحلم على حجرك انام
وتفردى شالك غطا
وتفردى كفك يمام
يحط على قلبى الذى
ولا يوم عرف غير الالام
شدينى من وسط الزحام
ودينى دنيا بتبتدى بيكى الربيع
انا مش هاضيع
لوحضنك الدافى الوسيع
بيضمنى وقت البكا