ماتصدقش بجد
ماتصدقنيش
ماتصدقش البسمه
اللى اترسمت على وشى
انا قاعد
ومراقبك
شايفك
عمال تفتح ادراج المكتب
وتشد ف شعرك
بتدور على حاجه
قديمه
وماتلاقيهاش
هتقوم من ع
الكرسى
وتقلب فى جيوب
البنطلون
المتعلق ع
المسمار
ولما ماتلقاش
الكبريت
تتنرفز
وترمى البنطلون
ع البلاط
هتخرج م الاوضه
وتخش المطبخ
وتشيل غطيان
الحلل
اللى بتغلى على
البوتاجاز
فى محاوله
أخيره انك تتذكر
وهتصرخ
أه
الكبريت
هتطلب قهوه
وتعدى الطرقه
العريانه
اللى مابين
المطبخ والصاله
ولما تحس
بالسقعه بتدخل رجليك
تتنطط
وتدخل جرى
وتقفل باب
الاوضه وراك
هتقعد على طرف
سريرك
وكلك رغبه
اكيده
انك تبكى
بعد شويه
هتسمع تلات
خبطات على باب الاوضه
وهتحس بدوران
الاوكره
هتدخل اختك
وتمد ايديها
بفنجان القهوه
هتبص ف عينك
باستغراب
وهتضحك ضحكة
خبيثه
لما تلاقى الجو
معبأ بالدخان
والجنيات عماله
بتتنطط جواه
ولما تصد فى سقف
الاوضه
تهرب م الشباك
المتوارب شيشه
وساعة ماهتسمع
رزعة باب الاوضه
واختك خارجه
ساعتها بس
هتلمحنى
وهتسخر منى
ويمكن تضحك
باستهزاء
وأكيد
هتقوم
وتكسّر برواز
الصوره
وتشخبط على وشى
بالقلم الاسود
ديوان " لوحدك " - 2003
No comments:
Post a Comment