هنا
فى المكان ده بالظبط
بيت قديم
وكإنه شاهد قبر
مابين العمارات العاليه
أنا فاكر
فى الدور التانى
بنت
باشوفها واقفه فى الشباك
ومواربه الشيش
أنا فاكر
مره ابتسمت لى
ودخلت من غير ماتقفل الشباك
وأختها الصغيره
وهى بتشب على سور البلكونه
علشان حبات المطره
تعمل مزيكا
على صوابعها الناعمه
البنت الفرحانه بالمطره
اللى بلت ايديها
ومش حاسه بالسقعه
اللى حاسس بيها
ولد ماشى ع الرصيف التانى
بيضم الياقه على رقبته
وبيعدل النضاره
هنا
فى المكان ده بالظبط
مش فاضل حاجه
غير
يافطه كبيره
وشجره قديمه
وسور حديد
لجنينه اتردمت
5 comments:
حلوة اوي
مفهمتش اخر سطر ..افتكرتك هتقول البيت اتهدم او فضي من سكانة.. مشفتش الجنينة بين سطورك لقيتها بس في اخر سطر
تحديد التفاصيل وسهولة التخيل عجباني اوي
الدور التاني والنضارة وصوابعها الناعمة
صادقة اوي وحلوة ولتاني مرة باشكرك علي اللقطات الحلوة علشان هنا في اكتر من لقطة وكلهم حلوين
العزيزه ساسو
اشكرك على اهتمامك
ولو ان الشعر لايشرح لكن نظرا لاعتزازى باهتمامك انا هاقول
فعلا ياساسو البيت اتهد
والجنينه اللى حواليه اتردمت
واليافطه اعلان عن البرج الشائه اللى هيتبنى مكان البيت الجميل
اشكرك جدا
شغل عالي يا معلم
احييك عليه
لا مقصدتش تشرحلي النص ..قصدي اني لقيت في اخر سطر وصف لعنصر مش موجود في النص
ده اللي قصدتة اني ملقتش الجنينة بين سطور النص لقيتها في اخر سطر بس
لكن الفكرة نفسها وصلتني
اهم حاجه انها وصلتك
ومتشكر جدا
Post a Comment