وانت داخل من باب الشقه
هتلاقى على شمالك أوضتين
سيبك م الاوضه الاولانيه
الاوضه المقفوله
ع الصالون المدهب
خليك فى الاوضه التانيه
الاوضه الصغيره
اللى فيها بلكونه
فى ركن منها هتلاقى الزرع
اللى سابه اخويا وسافر
والعصافير
اللى كانت بتصحينى من النوم
ايوه
هى ديه الاوضه بتاعتى
على يمينك
هتلاقى المكتب
اللى ذاكرت عليه من ساعة ماكنت
فى تانيه اعدادى
لو فتحت الدرج
مش هتلاقى الاجنده
اللى نسيت مره اقفل عليها
وبكده عرفوا
انا ليه زوغت
27يوم فى الثانوى
بس ممكن تلاقى
اول قصيده كتبتها
وماوريتهاش لحد
هتلاقى حاجات كتيره
مش فاكرها
فوق المكتب
متعلقه مكتبه صغيره
عملتها من شوية خشب قديم
وكنت بافرح جدا
كل ماتزيد على رفوفها الكتب
سريرين صغيرين
كل واحد فى ركن
ايوه هوا ده سريرى
السرير المركون جنب الحيطه
قرب شويه
هتلاقى قصيده كتبتها بالقلم الرصاص
اللى حاطه تحت المخده
يمكن تلاقى السرير مش مترتب
وعليه الهدوم اللى قلعتها قبل ماانزل
ورا الباب
بنطلون وقميص
وحزام واقع ع الارض
ماتنساش قبل ماتنزل
تقفل الكاسيت
الاوضه ديه بكل مافيها
مابقتش بتاعتى
من يوم ما طردنا ابويا
من البيت كله
المكتب بعته
مالوش مكان فى الشقه التانيه
والسرير
مارضيش يسيبه
واداه لابنه
اكيد
فيه ناس تانيين سكنوا مكاننا
واكيد
غيروا لون الحيطان
وشالوا اثار صوابعنا
اللى سبناها
تحت اكباس النور
7 comments:
بجد احساس حلو انك تبقي حابب حجاتك قوي كده بس لازم تفرح بالشقه الجديده لان اكيد هيكون فيها زكريات جديده واكيد جميله بحلوها ومرها ......جميله
ممكن احطلك رد كومينت علشان اكيد مش هتشوفة عندي
:محمود فهمي
انا سألتك عن اغنية سوليداد برافو جبتيها منين رديتى وقولتى الصح جبتها وانا مش فاهم حاجه
---
saso:
هاقولك المرة اللي فاتت كنت في تلعبوا معانا
وهناك مش انا اللي كنت حاطة غنوة سوليداد كان شريكي في البلوج هو اللي حطة
فصححلك انه ولد مش بنت(جبتها مش جبتيها) زي ماقالك
عن البوست فمرة قلتلك مش معقول كل مرة اقولك هايل وامشي
بس اديني برضه باقول هايل .. وماشية
حاسة بكل صورها اوي.. وبجد حلوة اوي
ساسو
وليه اكيد مش هاشوفه عندك
انا بازور البلوج بتاعك كتيير
اشكرك جدا
بتكتب عن الذكريات بحميمية جميلة
جميل يا محمود
يسرني ان اتقدم بخالص التهاني وأطيب التمنيات
لكم والأسرة الكريمة والأصدقاء
بمناسبة حلول شهر رمضان المبارك ،
أعاده الله علينا وعليكم وعلى مصرنا الحبيبة
بالخير واليمن والبركات
تقبل الله وكل عام وانتم بخير
دخلت عندك وميه صفحة مفتوحين
قفلتهم وجيت تاني
قريت القصيدة الاخيرة الحلوة طبعا
بس لقيت ان دي وحشتني فرجعت اقراها عشر مرات
مينفعش بعد ما احب سطور مقولكش شكرا قبل مامشي
شكرا
انا اللى متشكر جدا ماتعرفيش انا متأثر اد ايه واناباكتب الرد ده حقيقى متشكر
Post a Comment